Sampurasuuun
RUNTAH HATE
Sanajan ukur carpon tapi mudah-mudahanan aya pulunganeunana.
Aya bapa-bapa laklak dasar nyarekan saurang guru di hareupeun murid-muridna, alesan nyarekan ku pedah budakna distrap ku eta guru nangtung di hareupeun babaturanna sabab teu ngerjakeun PR. Bahasana mani garihal jeung matak pinyerieun, tapi eta guru teu ngalawan, malah cicing ngadengekeun bari ngabetem teu lemek teu nyarek.
Sanggeus nu nyarekan tea balik aya sababaraha urang murid nu nanya ka guru, “naha guru teu ngalawan sakitu diseuseulan laklak dasar teh?”
Pa Guru malah malik nanya ka murid-muridna.
“Upami bapa bade masihan hiji barang ka hidep tapi hidepna alim nampi, eta bàrang milik saha?”
“Tangtos nu bapa… margi abdina alim nampi”. Jawab salah saurang murid.
“Sami sapertos cariosan bapa-bapa tadi nu nyeuseulan. Kumargi bapa teu nampi kana cariosanna nu sakitu garihalna, maka eta cariosan bakal disimpen ku anjeuna. Bapa-bapa tadi teu nyadar anjeuna kedah nangel waler akibatna boh di dunya oge di aherat, margi eta energi negarif nu muncul tina emutan, peraosan, cariosan sareng kalakuan nu bakal ngahasilkeun kasusah hirup”. Sakedapan pa guru jempe, murid-muridna ge jempling, teu kadenge cing harewos komo kana gandeng bari hareureuy mah. Maranehna sidakep ngaregepkeun
Pa guru neruskeun deui caritaanna: “Sami sapertos jalmi nu hoyong ngotoran langit ku cara diciduhan. Ciduh bakal murag deui anu malah ngotoran beungeutna sorangan… Bisi kaalaman ku aranjeun aya jalma nu nyarekan, antepkeun we ulah dilawan… sabab manehna hakekatna keur miceun RUNTAH HATEna.
Lamun anjeun jempe atawa teu ngalawan maka eta runtah bakal balik deui ka dirina sorangan, tapi lamun dilawan hartina anjeun narima eta runtah”.
“Poe ieu teu saeutik jalma nu hirupna bari mamawa runtah dina hatena (runtah kakesel, runtah kaambek, runtah kangewa, runtah egois, jeung runtah-runtah lainna)… mangka urang kudu jalma nu BIJAK”.
Pa guru sakedapan jempe bari bulak balik leuleumpangan hareupun murid-muridna nu sidakep ngaregepkeun.
“Mun hidep teu mampu mere, maka ulah nyokot. Mun hidep ngarasa sulit keur mikanyaah, maka ulah ngewa. Mun hidep teu bisa ngahibur, maka ulah ngajadikeunna sedih. Mun hidep teu bisa muji, poma ulah ngahujat. Mun hidep teu bisa ngahargaan batur, maka ulah ngahina. Mun hidep teu bisa sosobatan, maka ulah jadi mumusuhan”.
Para wargi….
Ayeuna waktuna urang ngalatih diri keur miceun sakabeh runtah/ego nu aya dina hate urang… sabab lamun teu nungtut dipiceun maka eta runtah bakal numpuk jeung bakal nimbulkeun bau, geus pasti bakal jadi runtah masyarakat.
Cag ah…
Muga aya manfaatna. Aamiin